إيه الفرق مابين البطالة والبطاطا

السلام عليكم يااأحلى شباااااااااااااااب
انا الصراحة كنت عايز اخد رايكم فى موضوع يخص بلدنا مصر

وسؤاااااااااالى ليكم ......إيه الفرق مابين البطالة والبطاطا

بعد سهر الليلي على الكتب الخارجية ، فلوس أهالينا على الدروس الخصوصية ... بعد السنين الطويلة لـ 6 ابتدائي ، 3 اعدادي ، 3 ثانوي ، حوالي 5 جامعة ، والمصاريف الكتيرة على المجاميع الكبيرة ... تلاقي الشاب من دول يا ولداه بعد ما كان عنده طموح وأحلام وإقبال على الحياة ... واقف حزين قدامه يجي 6 مليون من العاطلين ... أصبح خريج خلاص ومش لاقي شغلانة ولو شافولوا شغلانة هيلقوها مش ماشية مع المؤهل بتاعه ولا سالكة مع مستواه الاجتماعي ، ... لكن ممكن في الزحمة يلاقي وظيفة شيك بمرتب محترم هيُفاجأ إن في غيره كتيير حاطط عينه عليها وكلهم مسابقينه بالإتصالات والوسايط .. طبعا لو ما عندكش اتصالات ووسايط هتفضل واقف في طابور الحكومة مستني وظيفة الحكومة ..
أقولك أنا بقى ايه اللي هيجرالك ... هتفضل واقف طبعا مش شوية أسابيع ولا حبة شهور .. لكن سنيين يعني ممكن تقفلك قول كدة 10 ، 15 سنة وبعد ما تعفن من كتر الإنتظار
ولا مؤاخذة رحتك تطلع .. حتلاقي نفسك أخيرا وليس آخرا موظف في الدرجة الساسة ( دا لو كنت محظوظ والحاجة بتدعيلك ) بمرتب من 45 ج الى 65 ج قول ياعم هيعملوا 85ج بعد العلاوات ،
أعتقد دول هيتصرفوا قبل ما يتقبضوا ، وهتستلف عليهم فلوس كتير ده لو بتصرف على نفسك بس وعاوز تجيب مصروف جيبك ، أعتقد صعب نتكلم عن مسؤليات وبيت وجواز والواقع بيأكد الكلام ده } 65% من العاطلين في مصر تقل أعمارهم عن 25 سنة { يعني نفسهم يخشوا دنيا لسة ومش عارفين "
وكل حاجة ليها سبب والبطالة عندنا في مصر ليها أسباب
احنا البطالة عندنا كتير :
علشان الحكومة عندنا كبرت دماغها ( من حيث الواقع ) من قضية توظيف الخريجين وتشغيل الشباب .
تاني سبب عشان الوظيفة عندنا بتخضع لنظام التسعيرة يعني مثلا لو كنت مهندس ومُنى عينك تشتغل في شركة بترول هتدفع 15 ألف جنيه من تحت الترابيزة بدون أي ضمانات يعني في احتمال كمان إنك ( لا تطول بلح الشام ولا عنب اليمن )
آه لو كنت متخرج من كلية الحقوق وعاوز تتعين في النيابة في الحالة دي فوق الواسطة 30 ألف جنيه ومش مشكلة تقديرك كان ايه ؟! وعموما عشان يكون عندك خلفية حتلاقي التسعيرة بتزيد وتعلى لو عاوز تتعين في وزارة الكهرباء أو هيئة الاتصالات وبتنزل وتقل شوية لو في وزارة التعليم
السب التالت عشان الوظيفة النهاردة بتتورث ( نظام أولوية وأحقية أبناء العاملين في التعيين ) وطل طلة على الجامعات أو على القضاء في مصر عشان تتأكد من النظام ده .. هتلاقي إن لو كان في حتى كفاءأكتر منك مليون مرة برضة مفيش أحسن منك بالمرة مدام بابا شغال عندنا هنا ....
السبب الرابع : - عشان القطاع الخاص مش قادر يستوعب الرقم الكبير بتاع البطالة ده .. ما بيتعينش في القطاع الخاص إلا قلة قليلة ولو مش مصدقين تعالوا نشوف اللي هيكنسل على وظيفة الحكومة وهيشق طريقه ايه اللي هيجراله :

·

إما يكون عنده واسطة ومتوصي عليه ده ما عندوش مشكلة ،·

أو يكون ما عندوش واسطة وبيدور على شغل ده عنده حل من اتنين :-
اما انه يرمي نفسه في أي شركة قطاع خاص عاوزة موظفين أو حتى مندوبين " متو سط أجره 150 - 200 ج " يعني يضحي بالفلوس عشان البريستيج يعيش أو أنه يضحي بشكله ومظهره ومؤهله ويشتغل في أي حاجة بتجيب فلوس حبتين ( في شباب كتير اختاروا الطريق التاني ) منهم شاب جامعي متخرج من كلية التجارة وواقف على عربية فول ، واحد تاني فارش شوية كتب قانون وبيبيع فيها على رصيف المحكمة طلع معاه ليسانس حقوق ( هوده التخصص ولا بلاش) ، التالت ده بقى كارثة مهندس حديث التخرج مش لاقي شغل مناسب فقرر انه يلتحق بشركة نظافة ، والله أنا شوفته بعيني وهو ماسك المكنسة وعمال يخطط بالجاروف ، ساعتها كنت عاوز أدعي على الحكومة من غيظي وأقول ( إلهي ما تكسبي ولا تخسري يا حكومة ) أصلها لو خسرت هتخسر من جيوبنا اللي مش مستحملة خسارة .
السبب اللي بعدكدة هو الفساد .. الفساد للي عمال ينخر في مصر زي السوس والفلوس اللي المفروض انها تشغل الشباب بتتقسم على الحرامية الكبار اللي واكلينها ولعة .. ولاد الإيه مستكترين علينا شوية صخر ننحت فيهم ونشق طريقنا حتى ده سرقوه ..
وطبعا نماذج السرقة والنهب غي المال العام بتاعنا ملهاش عدد حضربلكم مثالين للهبر والهبش عيني عينك :

عارفين إن في موظف في وزارة الزراعة اسمه ( يوسف عبدالرحمن ) ولاهو أخد من أمانة سيدنا يوسف ولا هو عبدالرحمن ....
الشيطان ده طلع عبد للدولار والجنيه ابن الإيه كان مرتبه أكثر من مرتب الوزير اللي عينه 20 مرة مش كدة وبس لأ ده كان أكبر من مرتب جورج بوش بجلالة قدره ( مرتب جورج بوش بالمصري يعمل حولي 193 ألف جنيه ) ومرتب الحرامي ده كان ربع مليون ومتسألنيش ليه ؟! ولما ظبطوه كانت التهمة رشوة يعني حاجة فوق المرتب كمان ( آآاه يا بلد ) .

مثال تاني لحوت من الحيتان الصغيرة أيضا :
رئيس مجلس ادارة مؤسسة صحفية كلها ديون كان بيهبر في جيبه كل شهر مليون جنيه ( يعني هتيجي عليه )

· تابــــــــــــع

عرفتوا دلوقتي ليه إحنا مش لا قين شغل وليه عندنا 6 مليون عاطل ،·

· عرفتوا ليه مصر وصل ترتيبها بين الدول لرقم 122 بعد ما كان 15 أيام محمد علي من حيث الرفاهية
·

عرفتوا ليه تقرير دليل الفقر العالمي وضع مصر في المرتبة ال 55 ما بين 103 دولة نامية

·

عرفتوا ليه تقرير التنمية البشرية لعام 2005 الصادر عن الأمم المتحدة بيقول ان فيه 44% من المصريين بيعيشوا بأقل من دولارين في اليوم الواحد ..

( طبعا هما ما يعرفوش الخيبة اللي احنا فيها يعني ياريت كنا فعلا وصلنا للدولارين في اليوم )

نصيحة :-
لو انت مش لاقي شغل في المحافظة اللي انت ساكن فيها أنصحك اوعى تدور على شغل في المحافظات التانية " عشان هلها هما أكتر ناس في مصر متضررين من البطالة وقلة الوظايف " ( أسوان ، كفر الشيخ ، قنا ، أسيوط ، الاسماعيلية، الدقهلية ، الوادي الجديد ، الغربية ، السويس ، شمال سينا ، بورسعيد )

يعني لو روحت بورسعيد ممكن بالصدفة تشوف يافطة مكتوب عليها " كريمة للبيع ، بدر للبيع ، بدويه للبيع ، أرزاق للبيع " طبعا هتفتكر الأسماء دي أسماء محلات لكن النكسة اللي هتكتشفها ان الأسماء دي بتاعة ولاد المواطن
}

محمد اسماعيل محمد { مواطن بورسعيدي قرر بيع أبناؤه في المزاد العلني .. حاجة ولا في الأحلام :: قرر بيعهم لأنه مش لاقي يصرف عليهم منين ؟!

.. الخبر منشور في جريدة المصري اليوم في صدر الصفحة الأولى يوم الإثنين ..

اصحي ياحكومة الناس بتبيع عيالها خلاص محدش هيصبر عليكوا أكتر من كدة .. سياسة تكبير الدماغ والضحك على الدقون مش هتمشي معانا ..

* أي عقل يصدق أن حكومتنا هتوفر 4 مليون فرصة عمل في 6 سنين إلا لو كانوا زي الكام مليون بتوع كل خطاب عرض ....... حاجة كدة لزوم تجديد الثقة للحكومة وبس .. لو الكلام ده بحق وحقيقي منين هيمولوا عشان يوفروا الفرص دي ، هيعتمدوا على القطاع الخاص اللي اتخصخص ، ولا القطاع الخاص اللي م بيفكرش غير في مصلحته .. مصلحته والربح وبس .

امتىالمسؤلين في بلادي هيصحوا عشان يشوفوا البطالة عملت فينا ايه ..
أخرت سن الزواج ، نشرت أمراض اجتماعية كتير يا جماعة النبي " صلى الله عليه وسلم " قال في حديث شريف
"

ان النفس اذ أحرزت قوتها استقرت " حديث شريف

يعني مشاكلنا الإجتماعية دي مش هتتحل إلا لما نساهم في حل مشكلة البطالة .. والعلاج هيكون بـ :
محاربة الوسايط وتسعير الوظايف والفساد.. أيوة الفساد عشان الفلوس اللي بتتنهب تترصد لمشكلة البطالة ( محتاجين 7% نمو اقتصادي على الأقل زيادة عن المعدل الحالي عشان نبقى مشينا في أول مشوار محاربة البطالة ) .
·

تنمية الإستثمار (العربي - العربي) } 800 مليار من رؤوس الأموال العربية مستثمرة برة{

تطوير وتغيير مناهج التعليم بشكل يتناسب وما يحتاجه العصر من تخصصات
وقدرات


الدراسة العميقة لسوق العمل وما يحتاجه من خبرات وتخصصات

·

اعتماد نظام التدريب التحويلي .

في النهاية

:-

طبعا كلكم بتقولوا إيه علاقة الكلام ده بسؤالى اللى فى الأول
هقولكم أنا ايه اللي جاب البطالة للبطاطا رغم ان البطالة في اللغة من

" الباطل " ، والعاطل في اللغة من " العطل والخلل "

رغم أن في تقاطع بين البطالة والبطاطا إلا أن

"

البطاطا بنشويها ونكلها ، والبطالة عمالة تشوي فينا وتكلنا "

إيه الفرق مابين البطالة والبطاطا 62zwz7n

مجرمـ ـآلرٍومآنسيـهـ

البطاطا بنشويها ونكلها ، والبطالة عمالة تشوي فينا وتكلنا "

كلام كويس
شكرا ليك

مشكور اوى ياصاحبى على موضوعك الجميل دا
ومنتظرين المزيد يامان

كلام جامد والله يا مجرم وكله صح
تحياتى

مشكورين على ردكمـ الجميلة

ويارب التوبيكـ يعجبكمـ

مجرمـ

تسلم يا باشا

شكرا شكرا شكرا

راى من راى سيد اللى هوا كاو بوى
البطاطا بتتشوى وبنشوفها وهيا بتتشوى وبناكلها
اما البطالة بتتشوى فينا وبنشوفها فى الكافتريات وعلى القهاوى

» الفرق بين ( الحب ) و ( الاعجاب )
» الفرق بين الحب و الاعجاب ؟
» الفرق بين الحب والرومانسيه
» الفرق بين مخ الرجل ومخ المراه
» الفرق بين الحب & الاستلطاف